لوآن ڈرے پریٹوریس نے کرس گیل کا 13 سالہ ٹی-20 ریکارڈ توڑا

ویسٹ انڈیز کے سابق کپتان کرس گیل کی ٹی-20 کرکٹ میں کھیلی گئی سب سے بڑی اننگ کا برسوں پرانا ریکارڈ ٹوٹ گیا ہے۔ جنوبی افریقہ کے لوآن ڈرے پریٹوریس نے ’سی ایس اے ٹی-20 چیلنج ٹورنامنٹ‘ کے دوران کرس گیل کا ریکارڈ توڑ دیا۔ پریٹوریس نے بلوم فونٹین میں سی ایس اے ٹی-20 چیلنج میں ٹائٹنز کی جانب سے کھیلتے ہوئے نائٹس کے خلاف محض 79 گیندوں پر 188 رنز کی ناقابل شکست اننگ کھیلی۔ پریٹوریس صرف 12 رنز کم ہونے کی وجہ سے ڈبل سنچری نہیں بنا سکے، لیکن انہوں نے 13 برسوں پرانے کرس گیل کے ریکارڈ کو توڑ دیا۔ اب ٹی-20 کی سب سے بڑی انفرادی اننگ پریٹوریس کے نام درج ہوگئی ہے۔

کرس گیل نے انڈین پریمیئر لیگ (آئی پی ایل) 2013 میں رائل چیلنجرز بنگلورو (آر سی بی) کے لیے کھیلتے ہوئے پونے واریئرز کے خلاف ناقابل شکست 175 رنز کی اننگ کھیلی تھی۔ 66 گیندوں پر کھیلی گئی اس اننگ میں گیل نے 17 چھکے اور 13 چوکے لگائے تھے۔ پریٹوریس کی اننگ پر نظر ڈالیں تو انہوں نے 24 گیندوں پر اپنی نصف سنچری مکمل کی۔ اس کے بعد اگلی 16 گیندوں پر انہوں نے اپنی سنچری مکمل کر لی۔ اس دھماکہ خیز بلے باز نے اپنی اننگ میں 79 گیندوں پر 188 رنز بنائے۔ اس دوران ان کے بلے سے 13 چھکے اور 15 چوکے نکلے۔

20 سالہ بائیں ہاتھ کے وکٹ کیپر بلے باز پریٹوریس کو جنوبی افریقہ کے سب سے زیادہ باصلاحیت بلے بازوں میں سے ایک مانا جاتا ہے اور انہیں کرکٹ کا مستقبل بھی سمجھا جاتا ہے۔ وہ جنوبی افریقہ کے لیے تینوں فارمیٹس میں ڈیبیو کر چکے ہیں۔ پریٹوریس 2 ٹیسٹ میچوں کی 3 اننگز میں ایک سنچری اور ایک نصف سنچری کی مدد سے 235، 3 ون ڈے کی 3 اننگز میں ایک نصف سنچری کی مدد سے 142 اور 17 ٹ-20 میچوں میں ایک سنچری اور 2 نصف سنچریوں کی مدد سے 427 رنز بنا چکے ہیں۔ میچ کی بات کریں تو ٹائٹنس نے پہلے بلے بازی کرتے ہوئے 20 اوورس میں 3 وکٹوں کے نقصان پر 267 رنز بنائے تھے۔ نائٹس کی ٹیم 17.2 اوور میں 143 رنز پر سمٹ گئی اور 124 رنوں سے شکست کا سامنا کرنا پڑا۔