آسٹریلیا میں ہندوستانی طلبا کو نئے ویزا قوانین سے مشکلات کا سامنا

بیرون ملک تعلیم حاصل کرنے کے لیے جانا ہر کسی کا خواب ہوتا ہے اور بہت سے ہندوستانی طلبا مختلف ممالک میں تعلیم حاصل بھی کر رہے ہیں۔ ان ممالک میں آسٹریلیا کا نام بھی شامل ہے، جہاں ہندوستانی طلبا کی تعداد بہت زیادہ ہے۔ لیکن اب آسٹریلیا میں تعلیم حاصل کر رہے یا تعلیم حاصل کرنے کا خواب دیکھ رہے طلبا کے لیے مشکلیں پیدا ہونے والی ہیں۔ آسٹریلیائی حکومت بین الاقوامی طلبا کے لیے ویزا قوانین کو مزید سخت کرنے جا رہی ہے۔ نئے قوانین کے تحت غیر ملکی طلبا کے لیے تعلیم کے دوران اپنے شوہر یا بیوی اور بچوں کو اپنے ساتھ آسٹریلیا لانے کا راستہ بند کرنے کا منصوبہ ہے۔

آسٹریلیا میں تعلیم حاصل کرنے والے طلبا کے لیے یہ تبدیلی ایسے وقت میں آئی ہے، جب آسٹریلیائی حکومت ملک میں بڑھتی ہوئی ہجرت کو کم کرنے کی کوشش کر رہی ہے۔ ایسا اس لیے ہوا ہے کیونکہ اب تک بہت سے بین الاقوامی طلبا تعلیم کے لیے آسٹریلیا جاتے وقت اپنے شریک حیات اور بچوں کو بھی ساتھ لے جانے کے لیے متعلقہ ویزا آپشنز کا استعمال کر سکتے ہیں۔ اب جس تبدیلی کی بات ہو رہی ہے، اس کے بعد یہ راستہ بہت محدود ہو جائے گا۔ تاہم، آسٹریلیائی حکومت نے بتایا ہے کہ بحرالکاہل کے جزائر اور جنوب مشرقی ایشیا کے کچھ ممالک کے طلبا کو اس قانون سے کچھ رعایت مل سکتی ہے۔ آسٹریلیائی حکومت کا بنیادی مقصد ملک میں آنے والے لوگوں کی تعداد کو کم کرنا ہے۔

خبر رساں ایجنسی ’رائٹرز‘ کے مطابق حکومت خالص ہجرت کو موجودہ تقریباً 3 لاکھ کی سطح سے کم کرکے 2028 تک تقریباً 2.25 لاکھ سالانہ کرنے کا ہدف رکھ رہی ہے۔ گزشتہ کچھ برسوں میں آسٹریلیا میں ہجرت تیزی سے بڑھی تھی۔ 2023 میں خالص ہجرت تقریباً 5.18 لاکھ تک پہنچ گئی تھی، جو جون 2025 تک گھٹ کر تقریباً 3.06 لاکھ رہ گئی۔ اس اعداد و شمار میں بین الاقوامی طلبا کا بھی بڑا کردار رہا ہے۔ آسٹریلیا میں بین الاقوامی طلبا کے معاملے میں سرفہرست 5 ممالک کو دیکھیں تو چین، ہندوستان، نیپال، ویتنام اور بنگلہ دیش سب سے آگے ہیں۔ آسٹریلیا میں بین الاقوامی طلبا پر مبنی رپورٹ کے مطابق ان 5 ممالک سے مجموعی بین الاقوامی طلبا کی نصف تعداد آتی ہے۔

رپورٹ کے مطابق مئی 2026 تک آسٹریلیا میں مجموعی طور پر 6,80,582 بین الاقوامی طلبا دیکھنے کو ملے۔ ان میں سب سے زیادہ چین کے طلبا تعلیم کے لیے جاتے ہیں، جن کا حصہ تقریباً 23 فیصد ہے۔ چین کے بعد ہندوستان 16 فیصد، نیپال 9 فیصد، ویتنام 5 فیصد اور بنگلہ دیش کا حصہ 4 فیصد ہے۔ آسٹریلیائی حکومت کی جانب سے یہ تبدیلیاں صرف طلبا تک محدود نہیں ہیں۔ حکومت نے ’ورکنگ ہالیڈے ویزا‘ کے لیے بیلٹ سسٹم اور کچھ ’وزیٹر ویزا‘ رکھنے والوں کے ملک کے اندر رہتے ہوئے دوسرے ویزا میں تبدیل کرنے پر پابندی جیسے اقدامات کا بھی اعلان کیا ہے۔

خاندان کو ساتھ لانے پر پابندی کے علاوہ آسٹریلیا بین الاقوامی طلبا کے لیے کئی دیگر قوانین بھی سخت کر رہا ہے۔ ان میں انگریزی زبان اور مالی صلاحیت سے متعلق ضروریات میں اضافہ اور اسٹوڈنٹ ویزا فیس میں بڑا اضافہ شامل ہے۔ رپورٹ کے مطابق گزشتہ 4 برسوں میں اسٹوڈنٹ ویزا فیس میں تقریباً 300 فیصد اضافہ ہوا ہے۔ غیر ملکی طلبا آسٹریلیا کے لیے آمدنی کا ایک بہت بڑا ذریعہ ہیں، لیکن ان کی بڑھتی ہوئی تعداد کو حکومت ہجرت پر قابو پانے کے نقطۂ نظر سے بھی دیکھ رہی ہے۔ یہی وجہ ہے کہ حکومت اسٹوڈنٹ ویزا اور خاندان کو ساتھ لانے جیسے قوانین کو سخت کرنے پر زور دے رہی ہے۔