صفاکدل کا عید گاہ علاقہ بنیادی سہولیات سے محروم، عوام کا احتجاج

حلقہ صفاکدل کا عید گاہ علاقہ بنیادی سہولیات سے محروم، سڑکوں کی کشادگی کا مطالبہ

سرینگر: عید گاہ کے علاقے، حلقہ صفاکدل میں تعمیر و ترقی، سڑکوں کی کشادگی اور دیگر بنیادی سہولیات کی عدم دستیابی کے باعث مقامی لوگوں کو مختلف مشکلات کا سامنا کرنا پڑ رہا ہے۔ مقامی لوگوں کا کہنا ہے کہ اس اہم علاقے کو ترقیاتی کاموں میں نظر انداز کیا جا رہا ہے، جس سے عوامی مشکلات میں مسلسل اضافہ ہو رہا ہے۔

مقامی باشندوں کے مطابق صفاکدل اور عید گاہ کا علاقہ اہمیت کا حامل ہے، جہاں تین اسپتالوں کی وجہ سے روزانہ بڑی تعداد میں مریضوں، تیمارداروں اور دیگر لوگوں کی آمدورفت رہتی ہے۔ اس کے باوجود سڑکوں کی کشادگی اور دیگر ضروری سہولیات کی کمی کے باعث لوگوں کو مشکلات کا سامنا کرنا پڑتا ہے۔

مقامی لوگوں کا کہنا ہے کہ انہوں نے نیشنل کانفرنس کی قیادت سے بھی اپنے مسائل حل کرنے کی اپیل کی تھی، تاہم ان کے مطابق ابھی تک ان مسائل پر خاطر خواہ توجہ نہیں دی گئی۔ عوام نے موجودہ ممبر اسمبلی سے مطالبہ کیا ہے کہ وہ علاقے کی ضروریات کو ترجیح دیتے ہوئے ترقیاتی کاموں کو تیز کریں۔

مقامی باشندوں نے حکومت اور متعلقہ حکام سے اپیل کی ہے کہ عید گاہ اور صفاکدل میں سڑکوں کی کشادگی، بنیادی ڈھانچے کی بہتری اور عوامی سہولیات کی فراہمی کے لیے فوری اقدامات کیے جائیں، تاکہ لوگوں کو روزمرہ کی مشکلات سے نجات مل سکے۔