مختصر جواب
عالمی عدالتِ انصاف نے میانمار کو روہنگیا مسلمانوں کے خلاف نسل کشی کا مرتکب قرار دیا ہے، جس میں متاثرین کے حقوق کی بحالی اور ذمہ داروں کے خلاف کارروائی کی ہدایت کی گئی ہے۔
اہم نکات
- عالمی عدالتِ انصاف نے میانمار کو روہنگیا مسلم اقلیت کے خلاف نسل کشی کا مرتکب قرار دیا۔
- عدالت نے میانمار کو متاثرین کے حقوق کی بحالی اور ذمہ داروں کے خلاف کارروائی کی ہدایت کی۔
- یہ عالمی عدالت کی تاریخ میں پہلا موقع ہے جب کسی ریاست کو نسل کشی کا مرتکب قرار دیا گیا ہے۔
- 9 ججوں نے میانمار کو روہنگیا مسلمانوں کے خلاف نسل کشی کا ذمہ دار ٹھہرایا۔
- عدالت کا فیصلہ حتمی ہے اور اس کے خلاف اپیل نہیں کی جاسکتی۔
- میانمار کی سکیورٹی فورسز نے ہزاروں روہنگیا مسلمانوں کو قتل کیا اور جنسی تشدد کیا۔
دی ہیگ: اقوام متحدہ کی عالمی عدالتِ انصاف (ICJ) نے میانمار کے خلاف ایک تاریخی فیصلہ سناتے ہوئے قرار دیا ہے کہ میانمار کی حکومت نے روہنگیا مسلم اقلیت کے خلاف نسل کشی کا ارتکاب کیا ہے۔ عدالت نے میانمار کو متاثرین کے حقوق کی بحالی، ذمہ داروں کے خلاف کارروائی اور روہنگیا مسلمانوں کی محفوظ واپسی کے لیے مؤثر اقدامات کرنے کی ہدایت دی ہے۔
الجزیرہ کی رپورٹ کے مطابق جمعرات کو عالمی عدالتِ انصاف کے صدر جسٹس یوجی ایواسوا نے تقریباً سات سال تک جاری رہنے والی قانونی کارروائی کے بعد فیصلہ سنایا۔ 15 رکنی ججوں کے پینل میں سے 9 ججوں نے قرار دیا کہ میانمار نے روہنگیا مسلمانوں کے خلاف نسل کشی کی ہے۔ یہ عالمی عدالت کی تاریخ میں پہلا موقع ہے جب کسی ریاست کو باضابطہ طور پر نسل کشی کا مرتکب قرار دیا گیا ہے۔ عدالت کا فیصلہ حتمی ہے اور اس کے خلاف اپیل نہیں کی جاسکتی۔
عدالت نے اپنے فیصلے میں کہا کہ میانمار کی سکیورٹی فورسز نے ریاست راکھین میں ہزاروں روہنگیا مسلمانوں کو قتل کیا، خواتین اور بچوں کے خلاف بڑے پیمانے پر جنسی تشدد کیا اور دیہات کو منظم طریقے سے تباہ کیا۔ اس کے علاوہ روہنگیا برادری کو جسمانی اور ذہنی اذیت پہنچانے کے ساتھ ساتھ ان کے خلاف نفرت انگیز مہم بھی چلائی گئی۔

