بھارتی سپریم کورٹ کے مشورے پر تنازع: "ٹکٹ مہنگا ہے تو سفر نہ کریں"

ٹکٹ مہنگا ہے تو سفر نہ کریں، بھارتی سپریم کورٹ کے مشورے پر تنازع

بھارت میں فضائی ٹکٹوں کی بڑھتی ہوئی قیمتوں کے معاملے پر سپریم کورٹ کے ایک مشورے نے نئی بحث چھیڑ دی ہے۔ عدالت کے ریمارکس، جن میں مہنگے ٹکٹ برداشت نہ کرنے والوں کو سفر نہ کرنے کا مشورہ دیا گیا، پر عوامی حلقوں میں سوالات اٹھائے جا رہے ہیں کہ کیا فضائی سفر عام شہریوں کی پہنچ سے باہر ہوتا جا رہا ہے؟

درخواست گزار نے عدالت کو بتایا تھا کہ دیوالی کے موقع پر فضائی ٹکٹوں کی قیمتوں میں معمول کے مقابلے میں تقریباً 700 فیصد تک اضافہ ہوا ہے۔ مثال کے طور پر دہلی سے کولکتہ کا ٹکٹ تقریباً 11 ہزار روپے سے بڑھ کر 78 ہزار روپے تک پہنچنے کا دعویٰ کیا گیا۔

درخواست میں حکومت سے مطالبہ کیا گیا تھا کہ تہواروں کے دوران فضائی کرایوں کو قابو میں رکھنے کے لیے ضابطہ بنایا جائے۔ اس معاملے کی اگلی سماعت 16 نومبر کو مقرر ہے۔