او بی سی کریمی لیئر معاملے میں مرکز کو سپریم کورٹ سے فوری راحت نہیں ملی، سابقہ حکم پر روک لگانے سے انکار

او بی سی کریمی لیئر ریزرویشن کے معاملے میں مرکزی حکومت کو سپریم کورٹ سے فوری راحت نہیں مل سکی۔ عدالت نے حکومت کی جانب سے دائر وضاحتی درخواست پر سماعت کرتے ہوئے تمام فریقین کو 17 ستمبر 2026 تک اپنا جواب داخل کرنے کی ہدایت دی ہے۔ جسٹس پی ایس نرسمہا اور جسٹس آر مہادیون پر مشتمل بنچ نے معاملے کی سماعت کی اور مرکزی حکومت کو عبوری راحت دینے کے ساتھ ساتھ اپنے سابقہ فیصلے کے نفاذ پر روک لگانے سے بھی انکار کر دیا۔

سپریم کورٹ نے 11 مارچ کو اپنے فیصلے میں واضح کیا تھا کہ او بی سی کریمی لیئر کا تعین محض والدین کی آمدنی یا ماہانہ تنخواہ کی بنیاد پر نہیں کیا جا سکتا۔ عدالت کے مطابق والدین کے عہدے، سماجی حیثیت اور ملازمت کے زمرے کو بھی کریمی لیئر طے کرنے کے لیے مدنظر رکھنا ضروری ہے۔

عدالت کے اس فیصلے کے تحت پبلک سیکٹر انڈرٹیکنگز، بینکوں اور نجی شعبے میں کام کرنے والے ملازمین کے بچوں کو صرف زیادہ تنخواہ حاصل ہونے کی بنیاد پر او بی سی ریزرویشن کے فوائد سے محروم نہیں کیا جا سکتا۔

مرکزی حکومت کی وزارتِ پرسونل نے سپریم کورٹ میں وضاحتی درخواست دائر کرتے ہوئے فیصلے پر عمل درآمد کے دوران درپیش عملی مشکلات کی نشاندہی کی ہے۔ حکومت کا مؤقف ہے کہ سپریم کورٹ کے فیصلے سے یو پی ایس سی امتحان 2025 کے عمل پر اثر پڑ رہا ہے۔

سالیسٹر جنرل تشار مہتا نے عدالت کو بتایا کہ یو پی ایس سی کی جانب سے تجویز کردہ 958 امیدواروں کی سروس ایلوکیشن کا عمل پہلے سے نافذ اصولوں کے تحت آخری مرحلے میں پہنچ چکا ہے۔ ان کے مطابق اگر سپریم کورٹ کے فیصلے کو سابقہ تاریخ سے نافذ کیا گیا تو میرٹ لسٹ، کیڈر ایلوکیشن، جن میں آئی اے ایس اور آئی پی ایس جیسی سروسز شامل ہیں، اور امیدواروں کی ٹریننگ کا پورا عمل متاثر ہو سکتا ہے۔

مرکز نے عدالت کو یہ بھی بتایا کہ فیصلے کے اثرات صرف مرکزی حکومت تک محدود نہیں رہیں گے بلکہ 18 ریاستوں اور مرکز کے زیر انتظام علاقوں میں جاری تقرریوں کے ساتھ اعلیٰ تعلیمی اداروں میں داخلوں پر بھی نمایاں اثر پڑ سکتا ہے۔

مرکزی حکومت کے خدشات سننے کے باوجود سپریم کورٹ نے اپنے سابقہ حکم پر عمل درآمد روکنے سے انکار کر دیا۔ تاہم عدالت نے تمام فریقین کو اپنا موقف پیش کرنے کے لیے وقت دے دیا ہے۔ اب اس معاملے پر اگلی سماعت 17 ستمبر 2026 کو ہوگی۔