ٹرمپ کا امریکی دفاعی بجٹ میں 350 ارب ڈالر کی فوری منظوری کا مطالبہ

ٹرمپ کا امریکی دفاع کے لیے 350 ارب ڈالر کے فنڈنگ بل کو فوری منظور کرنے پر زور

واشنگٹن: امریکی صدر ڈونلڈ ٹرمپ نے جمعرات کو سینیٹ کی قیادت پر زور دیا ہے کہ وہ ملک کے دفاعی شعبے کے لیے 350 ارب ڈالر کے فنڈنگ بل کو فوری طور پر آگے بڑھائیں۔ ٹرمپ نے امریکی فوجی صلاحیتوں کو مزید مضبوط بنانے اور قومی سلامتی کو یقینی بنانے کے لیے بڑے پیمانے پر سرمایہ کاری کی ضرورت پر زور دیا۔

سوشل میڈیا پر اپنے بیان میں ٹرمپ نے کہا کہ انہوں نے اپنی پہلی صدارتی مدت کے دوران امریکی فوج کو دوبارہ مضبوط بنایا تھا اور اب وہ اسے پہلے سے زیادہ طاقتور اور جدید بنانے کے لیے اقدامات کر رہے ہیں۔

انہوں نے ڈیموکریٹس پر تنقید کرتے ہوئے کہا کہ آئندہ کانگریس میں ڈیموکریٹک اکثریت کا بنیادی ایجنڈا قومی سلامتی کے لیے اس تاریخی سرمایہ کاری کی مخالفت اور اس کی راہ میں رکاوٹیں کھڑی کرنا ہوگا۔ ٹرمپ نے سینیٹ سے مطالبہ کیا کہ دفاعی فنڈنگ بل کی منظوری کے عمل میں مزید تاخیر نہ کی جائے۔