نیسلے کے بیبی فوڈ ٹیسٹ میں فیل، بچوں کی صحت سے کھلواڑ پر 3 مقدمات درج

ملک کے فوڈ سیفٹی ادارہ ’ایف ایس ایس اے آئی‘ نے بچوں کے لیے فوڈ بنانے والی کمپنی ’نیسلے انڈیا‘ کے خلاف کارروائی کی ہے۔ معاملہ چھوٹے بچوں کے لیے استعمال ہونے والے ’فارمولہ مِلک‘ یعنی دودھ سے متعلق پروڈکٹس کا ہے۔ ایف ایس ایس اے آئی کو ان پروڈکٹس کے اشتہارات میں کیے گئے کچھ دعووں اور ایک پروڈکٹ میں ضروری غذائی عنصر بایوٹن کی مقدار کو لے کر گڑبڑی ملی ہے۔ اس معاملے میں نیسلے انڈیا کے خلاف 3 الگ الگ مقدمات درج کیے گئے ہیں۔ ان میں ایک معاملہ پروڈکٹ کے اشتہار سے متعلق ہے، جبکہ دوسرے معاملے میں پروڈکٹ کی جانچ کے دوران بایوٹن کی مقدار مقررہ معیار سے کم پائی گئی۔

ایف ایس ایس اے آئی کی کارروائی میں نیسلے کے 2 فارمولہ مِلک پروڈکٹس کے نام سامنے آئے ہیں۔ ان میں ’نن ایکسیلاپرو اسٹیج 1‘ اور ’لیکٹوجین پرو 1‘ شامل ہیں۔ یہ دونوں پروڈکٹس چھوٹے بچوں کے لیے استعمال ہونے والے فارمولہ مِلک کے زمرے میں آتے ہیں۔ نیسلے اپنے نیوٹریشن زمرے میں ان برانڈز کے فارمولہ مِلک پروڈکٹس فروخت کرتی ہے۔

پہلا معاملہ ان پروڈکٹس کے اشتہارات اور تشہیری دعووں سے متعلق ہے۔ ایف ایس ایس اے آئی نے کمپنی کے کچھ دعووں پر سوال اٹھائے ہیں اور اسے غذائی قوانین کے تحت جانچ کا موضوع بنایا ہے۔ دراصل بے بی فوڈ کے معاملے میں پروڈکٹ کی پیکیجنگ اور اشتہارات میں کیے جانے والے دعووں کو لے کر کافی سخت قوانین ہوتے ہیں۔ اس معاملے میں ایف ایس ایس اے آئی کا کہنا ہے کہ کمپنی کی جانب سے کیے گئے کچھ تشہیری دعوے مقررہ ضوابط کے مطابق نہیں تھے۔ اسی بنیاد پر کارروائی کی گئی ہے۔

دوسرا معاملہ ایک پروڈکٹ میں موجود بایوٹن کی مقدار سے متعلق ہے۔ بایوٹن ایک ضروری وٹامن ہے، جو جسم کے لیے اہم ہوتا ہے۔ ایف ایس ایس اے آئی کی جانچ میں اس غذائی عنصر کی مقدار مقررہ معیار سے کم پائی گئی۔ خاص بات یہ ہے کہ دوبارہ جانچ میں بھی بایوٹن کی مقدار کم ہی پائی گئی۔ یعنی یہ صرف پہلی جانچ میں سامنے آنے والی کمی تک محدود نہیں ہے، بلکہ دوبارہ جانچ کے دوران بھی یہی صورت حال سامنے آئی۔

یہ کارروائی ایسے وقت میں ہوئی ہے جب بیبی فوڈ اور بچوں کے لیے استعمال ہونے والی غذائی مصنوعات کے معیار اور لیبلنگ کو لے کر ریگولیٹری ادارے مسلسل نگرانی کر رہے ہیں۔ ایف ایس ایس اے آئی کی کارروائی کا مطلب یہ نہیں ہے کہ نیسلے کے تمام بے بی فوڈ پروڈکٹس غیر محفوظ ہیں۔ موجودہ معاملہ کچھ مخصوص پروڈکٹس، ان کے اشتہاری دعووں اور بایوٹن کی مقدار سے متعلق ہے۔ ایسے معاملات میں ریگولیٹر یہ دیکھتا ہے کہ کمپنیاں مقررہ غذائی تحفظ اور لیبلنگ کے ضوابط پر عمل کر رہی ہیں یا نہیں۔ اس لیے بچوں کے لیے فارمولہ مِلک خریدنے والے والدین کو گھبرانے کے بجائے ڈاکٹر کے مشورے کے مطابق ہی بچے کے لیے فارمولہ مِلک خریدنا چاہیے۔