ڈاکٹر فاروق عبداللہ: جموں و کشمیر کی خصوصی حیثیت نیشنل کانفرنس کی میراث ہے

جموں و کشمیر کی خصوصی حیثیت نیشنل کانفرنس کی میراث ہے، اس کی بحالی کے لیے ہر قربانی دینے کو تیار ہیں: ڈاکٹر فاروق عبداللہ

جموں: نیشنل کانفرنس کے صدر اور سابق وزیر اعلیٰ ڈاکٹر فاروق عبداللہ نے کہا ہے کہ جموں و کشمیر کی خصوصی حیثیت پارٹی کی تاریخی میراث ہے اور یہ عوام کے دلوں کے بے حد قریب ہے۔ انہوں نے واضح کیا کہ خصوصی حیثیت، آئینی و جمہوری حقوق اور ریاستی درجے کی بحالی کے لیے نیشنل کانفرنس اپنی جدوجہد جاری رکھے گی اور اس مقصد کے حصول کے لیے کسی بھی قربانی سے دریغ نہیں کرے گی۔

جموں میں مختلف عوامی وفود، تاجروں، معزز شہریوں اور پارٹی کارکنوں سے ملاقات کے دوران ڈاکٹر فاروق عبداللہ نے کہا کہ جموں، کشمیر اور لداخ کے عوام کو اس جدوجہد میں متحد ہوکر اپنا تعاون دینا چاہیے۔ انہوں نے ریاستی درجے کی بحالی کو وقت کی اہم ضرورت قرار دیتے ہوئے کہا کہ اس سے منتخب حکومت عوامی مفاد میں آزادانہ اور مؤثر فیصلے لے سکے گی۔