مختصر جواب
سری نگر کے عیدگاہ اسمبلی حلقے کے صفاکدل اور ملحقہ علاقوں کے لوگ گزشتہ 50 برسوں سے بنیادی ترقیاتی کاموں کو نظر انداز کیے جانے پر تشویش کا اظہار کر رہے ہیں، خاص طور پر کرنگر صورہ روڈ کی خستہ حالی اور ٹریفک جام سے پریشان ہیں۔
اہم نکات
- عیدگاہ اسمبلی حلقے کے صفاکدل اور ملحقہ علاقوں میں 50 سال سے ترقیاتی کام نظر انداز ہیں۔
- کرنگر صورہ روڈ شہر کی اہم شاہراہ ہے جو بڑے اسپتالوں سے منسلک ہے۔
- درشکدل سے عیدگاہ تک سڑک کی تنگی سے روزانہ شدید ٹریفک جام رہتا ہے۔
- مریضوں، تیمارداروں اور ایمبولینسوں کو ٹریفک میں گھنٹوں انتظار کرنا پڑتا ہے۔
- مقامی لوگوں کا الزام ہے کہ منتخب نمائندوں نے مسائل پر توجہ نہیں دی۔
- عوام نے حکومت سے سڑک کو ترجیحی بنیادوں پر کشادہ کرنے کا مطالبہ کیا ہے۔
سرینگر: عیدگاہ اسمبلی حلقے کے صفاکدل اور ملحقہ علاقوں کے لوگوں نے گزشتہ تقریباً 50 برسوں سے بنیادی ترقیاتی کاموں کو نظر انداز کیے جانے پر تشویش کا اظہار کیا ہے۔ مقامی لوگوں کے مطابق کرنگر صورہ روڑ شہر کی ایک اہم شاہراہ ہے، جو بڑے اسپتالوں کے ساتھ منسلک ہونے کے باعث 24 گھنٹے ٹریفک کی بھاری نقل و حرکت کا مرکز رہتی ہے۔
عوام کا کہنا ہے کہ درشکدل سے عیدگاہ تک سڑک کی تنگی کے باعث روزانہ شدید ٹریفک جام رہتا ہے، جس سے عام مسافروں کے علاوہ مریضوں، تیمارداروں اور ایمبولینسوں کو بھی مشکلات کا سامنا کرنا پڑتا ہے۔ کئی مرتبہ لوگوں کو گھنٹوں ٹریفک میں پھنس کر انتظار کرنا پڑتا ہے۔
مقامی باشندوں کے مطابق گزشتہ کئی برسوں سے ہر سال سڑک کو کشادہ کرنے کی یقین دہانیاں کرائی جاتی رہی ہیں، تاہم عملی طور پر آج تک کوئی ٹھوس کارروائی سامنے نہیں آئی۔ لوگوں کا الزام ہے کہ منتخب نمائندے نے حلقے کے ان اہم مسائل پر خاطرخواہ توجہ نہیں دی۔
علاقے کے لوگوں کا کہنا ہے کہ مسلسل نظراندازی اور ترقیاتی وعدوں پر عمل درآمد نہ ہونے کے باعث وہ حکمران جماعت سے ناراض ہیں۔ عوام نے حکومت اور متعلقہ محکمہ جات سے مطالبہ کیا ہے کہ درشکدل سے عیدگاہ تک سڑک کو ترجیحی بنیادوں پر کشادہ کیا جائے تاکہ مریضوں، مسافروں اور مقامی آبادی کو روزانہ کی ٹریفک مشکلات سے نجات مل سکے۔