مہاراشٹر میں 1972 کے بعد بدترین قحط، کسانوں کو شدید بحران کا سامنا

مہاراشٹر میں مراٹھواڑہ واقع 3 اضلاع لاتور، بیڈ اور دھاراشیو کے آس پاس کے علاقوں میں بارش نہیں ہونے کی وجہ سے 80 فیصد فصلیں خشک ہو چکی ہیں۔ فصل کی اس تباہی کی وجہ سے کسانوں کو سخت بحران کا سامنا کرنا پڑ رہا ہے۔ لاتور، بیڈ، پربھنی اور دھاراشیو سب سے زیادہ قحط متاثرہ اضلاع ہیں، جہاں جون سے ستمبر کے دوران معمول کی 679.5 ملی میٹر بارش کے مقابلے میں صرف 424.5 ملی میٹر بارش ہوئی۔ قحط کا یہ بحران صرف کھیتوں تک محدود نہیں ہے۔ اس کا اثر مویشیوں کے چارے، دیہی مزدوری، گھریلو آمدنی اور اگلی فصل کے لیے ضروری سرمایہ پر بھی نظر آنے لگا ہے۔

لاتور ضلع کے دیوکارہ گاؤں سے ایک دردناک تصویر سامنے آئی ہے۔ جہاں پہلی بار 2 ایکڑ زمین کے کاشتکار تکارام گٹے نے خودکشی کی۔ سویا بین، کپاس، ارہر کی فصلیں مرجھا گئی ہیں۔ ہنگن گاؤں کے کسان تکارام امباجی 40 ایکڑ کے مالک ہیں۔ انہوں نے فی ایکڑ 30000 سے 35000 روپے خرچ کیے ہیں۔ ان کا کہنا ہے کہ ایسا لگتا ہے جیسے اخراجات بھی نہیں نکل سکیں گے۔ ہگدل گاؤں کے بالاجی منڈے بتاتے ہیں کہ گنا عام طور پر 20 سے 25 فٹ تک ہوتا ہے، لیکن اس بار یہ 10 سے 12 فٹ پر ہی رک گیا ہے اور سوکھ رہا ہے۔ بالاجی منڈے کہتے ہیں کہ 2025 میں بہت زیادہ بارش نے پریشان کیا اور اس بار بارش کی قلت نے بحران پیدا کر دیا ہے۔

ساورگاؤں روکڑے کے رام بیلاڈے سویابین، ارہر اور جوار اگاتے ہیں۔ 8 ایکڑ کی ان کی فصل میں تقریباً ڈیڑھ لاکھ روپے خرچ ہوئے ہیں، اب کھیت صاف کرنے کے لیے بھی فی ایکڑ 5 ہزار روپے خرچ کرنا پڑے گا۔ فصل میں کچھ رہ جائے گا تو وہ صرف مویشیوں کے چارے کے لیے کام آئے گا۔ لاتور اور بیڈ ضلع کے تالابوں میں پانی بہت کم ہے۔ ماجرا ندی لاتور کی لائف لائن ہے۔ لاتور شہر سے تقریباً 70 کلو میٹر دور دھاراشیو اور بیڈ کی سرحد کے قریب واقع ماجرا ڈیم کی آبی سطح بہت زیادہ نیچے پہنچ چکی ہے۔ لاتور ضلع کے 158 آبی ذخائر میں اوسط ذخیرہ 12.5 فیصد رہ گیا ہے۔

یہاں نواب دور کا سائی ڈیم بھی اسی آبی تاریخ کا حصہ ہے۔ ہندی نیوز پورٹل ’امر اجالا‘ نے اپنی ایک رپورٹ میں مقامی صحافی ششی کانت پاٹل کے حوالہ سے بتایا کہ کبھی سائی ڈیم کے پانی سے لاتور کی پیاس بجھتی تھی۔ لیکن اب یہ استعمال میں نہیں ہے۔ ششی کانت کا کہنا ہے کہ اگر پانی کے رساؤ اور پانی کے انتظام پر مناسب توجہ دی جاتی تو بحران کی شدت کو کم کیا جا سکتا تھا۔ سابق ضلع پریشد رکن تریامبک نارائن گٹے موجودہ حالات کو 1972 کے بعد کی سب سے سنگین خشک سالی کی صورتحال میں سے ایک مانتے ہیں۔ بحران کے آثار مانسون کے ابتدائی مہینوں میں ہی نظر آنے لگے تھے۔ اب بحران کے 3 مرحلے سامنے ہیں۔ پہلے بوائی کا بحران، پھر فصل بچانے کا بحران اور اب کسانوں کے سامنے فصل ہٹانے اور اگلی فصل کے لیے سرمایہ جمع کرنے کا بحران درپیش ہے۔

مہاراشٹر حکومت نے قحط زدہ علاقوں میں راحت رسانی کے لیے اقدامات شروع کیے ہیں۔ ستمبر کے آخر میں ریاست کے 265 تعلقوں کے بعد 43 تعلقوں کو خشک سالی سے متاثرہ فہرست میں شامل کیا گیا ہے۔ وہیں فصلوں کے نقصان کے پنچ نامے، پانی اور چارے کے انتظامات جیسے اقدامات پر تبادلۂ خیال کیا گیا ہے۔ افسران کا کہنا ہے کہ خشک سالی سے نجات پانے کے لیے سرکاری خزانے پر 50 ہزار کروڑ کا بوجھ بڑھ سکتا ہے۔ لیکن فصلوں کے نقصان کے معاوضے اور پانی اور چارے کے انتظام جیسے اقدامات کے علاوہ کسانوں کو اگلی فصل تک اپنے کنبے کو چلانے کے لیے انکم سپورٹ کی اشد ضرورت ہے۔