پاکستان نے تائیوانی ایئرلائنز کو فضائی حدود کے استعمال کی اجازت بحال کردی

تائیوانی ایئرلائنز کو پاکستانی فضائی حدود سے گزرنے سے روکنے کا معاملہ، چین کی ون چائنا پالیسی اہم وجہ قرار

پاکستان کی جانب سے تائیوان کی دو بڑی فضائی کمپنیوں چائنا ایئرلائنز اور ایوا ایئر کو اپنی فضائی حدود استعمال کرنے سے عارضی طور پر روکنے کے معاملے نے بین الاقوامی سطح پر توجہ حاصل کرلی ہے۔

میڈیا رپورٹس کے مطابق پاکستان کے وزیر دفاع اور ہوا بازی کے امور کے نگران خواجہ آصف نے اس فیصلے کی وجہ چین کی ’’ون چائنا پالیسی‘‘ کو قرار دیا تھا، جس کے تحت پاکستان تائیوان کو چین کا حصہ تسلیم کرتا ہے۔

اطلاعات کے مطابق 25 اکتوبر سے تائیوانی ایئرلائنز نے پاکستانی فضائی حدود استعمال کرنا بند کردیا تھا، جس کے نتیجے میں ایشیا سے یورپ جانے والی متعدد پروازوں کو روس یا متبادل راستوں سے گزارنا پڑا۔ اس تبدیلی سے پروازوں کے دورانیے اور ایندھن کے اخراجات میں اضافے کا خدشہ پیدا ہوا۔

تاہم اس معاملے میں ایک اہم پیش رفت اس وقت سامنے آئی جب 28 اکتوبر کو پاکستان سول ایوی ایشن اتھارٹی نے دونوں ایئرلائنز کو 27 مارچ 2027 تک پاکستانی فضائی حدود استعمال کرنے کی اجازت دے دی۔

تائیوان نے پاکستان کے ابتدائی فیصلے پر افسوس کا اظہار کیا، جبکہ تائیوانی حکام نے اس اقدام کے پیچھے چین کے دباؤ کا شبہ بھی ظاہر کیا۔ دوسری جانب پاکستان کی جانب سے فضائی حدود کی اجازت بحال کرنے کی دستاویزات میں سابقہ پابندی ختم کرنے کی وجوہات واضح نہیں کی گئیں۔

اس پورے معاملے نے چین اور تائیوان کے درمیان جاری سیاسی تنازع اور عالمی فضائی رابطوں پر اس کے ممکنہ اثرات کو ایک مرتبہ پھر نمایاں کردیا ہے۔