بانکا میں لڑکی سے بدسلوکی کا واقعہ، ویڈیو وائرل ہونے پر پولیس متحرک

بہار میں خواتین اور لڑکیوں کی سلامتی کو لے کر ایک بار پھر سنگین سوالات کھڑے ہو گئے ہیں۔ جموئی اور سمستی پور میں نوجوان لڑکیوں کے ساتھ سرعام بدسلوکی کے واقعات کے بعد اب بانکا ضلع کے مشہور مذہبی و سیاحتی مقام مندار پہاڑ سے ایک انتہائی شرمناک معاملہ سامنے آیا ہے۔ سوشل میڈیا پر ایک ویڈیو تیزی سے وائرل ہو رہی ہے، جس میں کچھ دبنگ نوجوان ایک لڑکی اور اس کے ساتھیوں کے ساتھ بدتمیزی، گالی گلوچ اور مار پیٹ کرتے ہوئے دکھائی دے رہے ہیں۔

وائرل ویڈیو میں دکھائی دے رہا ہے کہ 3 سے 4 منچلے نوجوان مندار پہاڑ کے احاطے میں ایک لڑکی کو گھیر کر ڈرا دھمکا رہے ہیں۔ ایک سرپھرے لڑکے کے ہاتھ میں ڈنڈا ہے، جبکہ دوسرے کے ہاتھ میں چپل ہے۔ ملزم نوجوان زبردستی لڑکی کا ہاتھ پکڑ کر کھینچتے ہیں اور اسے مارنے کی دھمکی دیتے ہیں۔ ویڈیو میں متاثرہ لڑکی انتہائی خوفزدہ اور سہمی ہوئی نظر آ رہی ہے۔ اتنا ہی نہیں، جب لڑکی کے ساتھ موجود دیگر نوجوانوں نے مخالفت کرنے کی کوشش کی تو ملزمین نے ان کے ساتھ بھی گالی گلوچ اور مار پیٹ کی۔

یہ ویڈیو سوشل میڈیا پر وائرل ہوتے ہی بانکا پولیس انتظامیہ میں ہلچل مچ گئی۔ معاملے کی سنگینی کو دیکھتے ہوئے بونسی تھانہ پولیس نے فوراً نوٹس لیا اور ویڈیو کی حقیقت کی جانچ شروع کر دی۔ بونسی تھانہ انچارج انسپکٹر پنکج کمار جھا مسلح دستے (سپاہی گووند کمار، سپاہی رام بھجو شرما اور ہوم گارڈ والمیکی کمار پنڈت) کے ساتھ خود مندار پہاڑ پہنچے اور جانچ کی۔ مقامی دکانداروں سے پوچھ گچھ کے دوران تصدیق ہوئی کہ ویڈیو مندار پہاڑ کی ہی ہے اور ملزمین مقامی نوجوان ہیں۔ پولیس ذرائع کے مطابق یہ واقعہ غالباً اپریل ماہ کا ہے۔ تھانہ انچارج پنکج کمار جھا کے تحریری بیان کی بنیاد پر 6 سے 7 نامعلوم نوجوانوں کے خلاف مقدمہ درج کر لیا گیا ہے۔ پولیس وائرل ویڈیو کی بنیاد پر منچلوں اور متاثرہ لڑکی کی شناخت کرنے میں مصروف ہے۔

واضح رہے کہ بہار میں حالیہ دنوں میں اس طرح کے واقعات پر پولیس سخت نظر رکھ رہی ہے۔ جموئی کے مڑوا پہاڑی پر طالبہ کے ساتھ بدسلوکی کرنے والے کلیدی ملزم نندن یادو کو پولیس نے انکاؤنٹر کے دوران ٹانگ میں گولی مار کر گرفتار کیا تھا۔ وہیں، سمستی پور کے کرپوری گرام علاقے میں لڑکی سے چھیڑ چھاڑ کے معاملہ میں پولیس نے فوری کارروائی کرتے ہوئے 4 منچلوں کو جیل بھیجا ہے۔ اب دیکھنا یہ ہوگا کہ بانکا پولیس مندار پہاڑ پر غنڈہ گردی کرنے والے ان سرپھرے دبنگ نوجوانوں کو کب تک گرفتار کر کے سلاخوں کے پیچھے بھیجتی ہے۔